طريقة عمل كيكة هشة و ناعمة

236

المقادير:

  • ٤ بيضات بدرجة حرارة الغرفة
  • فانيليا
  • معلقة صغيرة خل
  • كوب زيت
  • كوب سكر
  • كوب لبن اللى هو الحليب
  • رشه ملح
  • معلقة كبيرة بيكنج بودر
  • ٢ كوب دقيق منخول
  • معلقة كبيرة كاكاو خام

الطريقة :

هنجيب بوله و نحط فيها الدقيق و رشه الملح و البيكنج بودر و نقلبهم كويس و نسيبهم على جنب.

فى الخلاط هنضرب البيض مع السكر و الفانيليا و الزيت و اللبن و الخل لغايت ما لونهم يفتح و حجمهم يتضاعف و هناخدهم و نضيفهم على المواد الجافة و نقلبهم كويس بحيث يمتزجوا تماما.

بعدين هنقسم الخليط لنصين نص هنسيبه ابيض زى ما هو و النص الثاني هنضيفله معلقة الكاكاو و نقلب كويس اوى كده بقى عندنا خليط ابيض و خليط بنى.

هنجيب الصينيه اللى هنسوى فيها و نكون دهنينها بالزيت و معفرينها بالدقيق و بعدين هناخد مقدار متساوى من كل خليط تقريبا مقدار نصف كوبايه أو اقل شويه هناخد الأول من الخليط الأبيض و نحط المقدار اللى خدناه فى نص الصينيه و بعدين نحط عليه مقدار من الخليط البنى نحطه فى النص و كل ما نحط هنلاقى الدايره بدأت تكبر و تكبر و هكذا لغايت ما نخلص الخليطين مره ابيض و مره بنى.

بعد ما نخلص هنجيب عود خشب أو بطرف السكينه و نبدأ نعمل اى شكل كده عالوش هنبدأ من النص و نسحب الخط لباره و هكذا لغايت ما نعمل شكل الورده الحلو داه و ممكن تسيبوها دواير زى ما هى دى حاجه زياده كشكل بس.

بندخلها فرن سخن على الرف اللى فى النص على درجه حرارة 180 لغايت ما تستوى و تاخد لون حلو نقدر نختبرها بخله أسنان او سكينه بعد نصف ساعة و نشوف استويت و لا لسه و اول ما تطلع من الفرن بنسيبها تبرد تماما و بعدين بنخرجها من الصينيه و نقطعها و نقدمها.

 

التعليقات متوقفه