طريقة عمل كيكة البرتقال
كيكة البرتقال والفروتة المسكرة
رجعنا انهاردة بوصفة كيك وهمية هشة وجميلة ولذييييذة ومختلفة. فى مناسبة شغالة, فى لانش بوكس شغالة, في فطار مع كوباية شاى بلبن. جربوها هتعجبكم جدا جدا.
المقادير:
- تلت بيضات
- كوب ونص سكر
- كوب الا ربع زيت
- كوب الا ربع عصير برتقال تانج
- كوبين دقيق
- تلت معالق نشا
- باكو بيكنج بودر
- فانيليا ومعلقة خل
- فروتة مسكرة حسب الرغبة
الجليز او الصوص عبارة عن:
كوب سكر بودرة+معلقة كبيرة لبن بودرة+فانيليا+برش برتقال لو متوفر+تلت معالق لبن ساقع
الطريقة:
بالمضرب او ف الخلاط هنضرب البيض والسكر والفانيلا والخل شوية لحد اما لونه يفتحز
هننزل بالزيت ونضرب بعد كدة عصير البرتقال ونضرب بالمضرب علي اقل سرعة او بالمعلقة هنضيف الدقيق المنخول والنشا والبيكنج بودر ع مرتين ونقلب.
اخر حاجة هننزل بالفروتة المسكرة ونقلب. و هنكون مجهزين قالب او صينية مدهونة زيت وننزل بالخليط فيها.
ندخلها الفرن لحد اما تستوى وتحمر ونخرجها ونسيبها تبرد ونكون مجهزين الصوص اللى هو عبارة عن سكر بودر ولبن بودر وفانيلا وبشر برتقال وتلت معالق لبن ونقلب لحد اما يبقى سايل وننزل بيه ع الكيك. ونقطعها شرايح زى ما تحبو.
التعليقات متوقفه