طريقة عمل تورتة بالكريمة و الحشو
المقادير
الكيكة :
- ٤ بيضات
- ٣ كوب دقيق
- ٢ كوب سكر
- علبتين زبادى (العلبة ١٠٥ جرام )
- كوب زيت
- كيس بيكنج بود
- معلقة كبيرة خل
- رشة ملح
الطريقة :
*فى الخلاط…بنضرب السكر والبيض والفانيليا كويس قوى وبعدين نضيف الزبادى ونضرب وننزل بالزيت( خيط)ونضرب كويس قوى ونضيف معلقة الخل ….كل ده يتضرب كويس مع بعضه
*فى بولة ….حنحط الدقيق وعليه البيكنج بودر ورشة الملح ….ونقلبهم كويس
*ننزل بخليط (الخلاط ) على الدقيق ونقلب كويس فى اتجاه واحد حتى يختفى الدقيق
*حنضيف على الخليط (ربع كوب ماء )ونقلب كويس فى اتجاه واحد للتخلص من أى كلاكيع للدقيق(التركة اللى كتير لسه خايف منها )
*هنا حنولع الفرن على (١٨٠)
*عندى حلة الومنيوم مقاس (٢٤)…شيلت اليدات بتاعتها علشان أدخلها الفرن ….طبعا ببطنها بالزبدة والدقيق كويس علشان الكيكة متلزقش فيها
*أصب خليط الكيكة فى الحلة واخبط الحلة على الرخامة خبطة خفيفة
*أدخلها الفرن على الشبكة فى المنتصف …على درجة (١٨٠)لمدة (١٠) دقايق …وبعدين أوطى الحرارة (١٦٠)لمده (٣٠)دقيقة …لما اشم ريحة الكيك (مش قبل ٣٥) افتح اتأكد إنها استوت …لو استوت تمام باطفى الفرن ….لو لسه أوطى الفرن شوية و اسيبها كمان ( ٥)دقايق
*باطفى الفرن واسيبها جوة الفرن تبرد
الكريمة والحشو :
*بأغسل (مانجيتين ) واقشرهم …بأقطع مكعبات من المانجة …وفى الخلاط باخد جزء واضربه كويس قوى علشان يبقى كريمى (يادوب نصف كوب)
*فى بولة …أحط كوب وربع كريم شانتيه خام ..واضيف نصف كوب سكر بودرة …ونصف كوب المانجة الكريمى ..وانزل بلبن مثلج تقريبا (كوب الا ربع )
*أضرب بالمضرب كويس على أعلى سرعة لغاية لما الكريم شانيه يتقل ويزيد …نحطه فى التلاجة شوية
طريقة التزيين:
*بعد الكيك ماتبرد خاااالص
*باقلب الكيكة على صينية كبيرة وبقسم الكيكة( تلات طبقات )…
*الطبقة اللى كانت على وش الكيكة بآخدها وخليها تحت واسقيها بشربات خفيف …وأفرد عليها جزء من الكريمة اللى حضرناها ….واحط عليها قطع من المانجة اللى قطعناها ..وبعدين باحط الطبقة التانية واسقيها بالشربات وبعدين الكريمة وبعدين قطع المانجة …وبعدين الطبقة الأخيرة اسقيها بالشربات وبعدين الكريمة على الوش النهائى وأساوى الوش والجناب بالكريمة
*ذوقى الوش براحتك بقى …أنا عملت وردات وحطيت قطع المانجة على الوش…وعلى التلاجة على طول علشان الكريمة تمسك والطبقات تتماسك مع بعض
ملحوظة:
*باسقى الطبقات بشربات خفيف وبمعالق بسيطة
*الكريمة لونها ( أصفر )علشان عصير المانجة اللى ضربناه مع الكريم شانتيه
Magda Zaki
التعليقات متوقفه