وصفة و طريقة عمل الإكلير – بطريقة Magda Zaki

226

مقادير الإكلير:

  • كوب دقيق
  • كوب ماء
  • نصف كوب زبدة(١٠٠جرام )
  • ٣بيضات
  • معلقة سكر
  • فانيليا
  • ذرة ملح

الطريقة:

حنرفع على النار المية ونضيف ليها الزبدة ومعلقة السكر وأول الخليط مايغلى ننزل بالدقيق (المضاف ليه ذرة الملح )ونوطى النار ونقلب كويس حوالى ٣ دقايق علشان الدقيق يستوى ويختفى تماما.

ونترك الخليط ده حتى يبرد تماما…..ثم ننزل عليه بالبيض المضاف إليه الفانيليا ..واحدة واحدة مع التقلب المستمر حتى يختفى البيض تماما

نبدأ نشكل الإكلير صوابع باستخدام كيس الحلوانى …أو نعمله صوابع بالإيد (زى كفتة الأرز )ونرصه فى صينية(يفضل الصوانى الألومنيوم ) مدهونة زيت خفيف …ونسيب مسافة بين الوحدات.

الخبيز :
وهنا بقى( تركة التسوية )وسبب أساسى لنجاحه ..بنخبزه على الشبكة فى منتصف الفرن على درجة (٢١٠)بياخد مابين (٣٥:٤٠) دقيقة..
بتلاحظيه من زجاج الفرن …علامة السوى إنه ينتفخ ويبدأ يحمر …كل ده تشوفيه من زجاج الفرن ….

إوعى تفتحى الفرن خلال فترة الخبز أو حتى لما تقفلى عليه ….لازم الفرن يبرد عليه تماما وإلا حيهبط منك ويروح تعبك عالفاضى …ماهو ياناجح (ألف مبروووك)…ياباظ (مش حتقدرى تعمليله حاجة)..فعلشان كده بأكد متفتحيش عليه غير لما تحسى إن الفرن برد خااالص

لما يبرد إحشيه بقى بالكريم باتسيير أو كريمة الشيكولاتة أو أى حشو تحبيه …و(التوبينج )بتاعه زى ماتحبى والمتوفر عندك

*بالنسبة للتكلفة :
تخيلى إن المقادير دى الناتج بتاعها (١٨)قطعة بالحجم ده. وقطعة الإكلير الواحدة لو من محل حلويات تعبااان لا تقل عن (٧جنيه )

*طبعا لما بنيجى نحشيه بعد التسوية بنفتحه من الجنب بسكينة مشرشرة

*تعديل هام جدا :
للناس اللى مقلقة من درجة الحرارة أو فرنهم عالى وخايفين يتحرق (لاقدر الله)…الفرن لازم يكون عالى لغاية لما ينتفخ ويبدأ يحمر وبتلاحظيه….لما يوصل لكده ممكن توطى النار فى الآخر شوية علشان قلبه يبقى مستوى

*الإكلير لايضاف إليه بيكنج بودر ولا خميرة

 

الحشو:

*هنحشي الإكلير إزاى ؟..إما بكريم باتسيير ….أو بكريم شانتيه …واللى يحب الطعم الغنى بيخلط الإتنين ويحشى بيهم

الكريم باتسيير :

المقادير (للكمية دى من الإكلير ):
٢ كوب لبن_ ٢ بيضة (كاملة ) _معلقتين ونصف كبار نشا_ ٥ معالق كبار سكر (ممكن تقللى حسب الذوق)_معلقة صغيرة زبدة _ فانيليا _ذرة ملح

الطريقة (ونركز بقى شوية):
*فى بولة حنكسر البيض ونضيف له الفانيليا ونضرب بشوكة وبعدين نضيف لهم النشا ونضرب بالشوكة لنتخلص من أى كلاكيع ونسيبهم شوية
*حنحط اللبن على النار يغلى ونضيف له السكر وندوبه كويس …لما اللبن يغلى …نطفى عليه وناخد منه ربع كوب
*الربع كوب لبن المغلى حننزل بيه مع التقليب على خليط البيض والنشا ونقلب كويس قوى ….لو فضل فيه كلاكيع نصفيه بمصفاة

*حنرجع كسرولة اللبن تانى على نار واطية …وننزل عليه بخليط البيض واللبن والنشا فى صورة خيط مع التقليب المستمر ….(اوعى تبطلى تقليب لغاية لما تلاقى القوام تقل معاكى )…..ضيفى بقى معلقة الزبدة وقلبى علشان تدوب …خليه شوية على النار مع التقليب وبعدين اطفى عليه

*فى لحظتها غطيه بكيس بلاستيك بحيث يلاصق سطح الكريم باتسيير علشان الوش ميكونش( قشرة )
*سبيه لما يهدأ وحطيه فى التلاجة يبرد لوقت استخدامه (اوعى تستعمليه سخن )

*التوبينج (الطبقة اللى بنغطى بيها الإكلير )
*المقادير :
كوب لبن ساقع _كوب سكر _نصف كوب كاكاو خام _كوب زيت ذرة (ممكن منستعملوش كله )

*فى الخلاط :
حنضرب اللبن مع السكر مع الكاكاو كويس قوى علشان السكر يدوب …وبعدين نفتح الخلاط من فوق وننزل بالزيت على شكل خيط لغاية لما القوام يتقل ….نفضيه فى علبة ونحطه فى التلاجة لوقت استخدامه

*طريقة حشو الإكلير:
_بعد الإكلير مايبرد خاالص بنفتحه كله مرة واحدة من الجنب بسكين مشرشر

_حنحشي كل واحدة باستخدام معلقة صغيرة بالكريم باتسيير

_آخر حاجة حنمسك كل واحدة ونغطيها بصوص الشيكولاتة

_حنبرده فى التلاجة ساعة أو ساعتين وبعدين نزوق الوش بقى بمكسرات أو شيكولاتة فارماسيل …أو حتى ممكن منعملش صوص الشيكولاتة ونرش عليه سكر بودرة ….حسب ذوقك الشخصى والمتاح

ملاحظة مهمة قوى :
_درجة الحرارة العالية هى والبيض عامل الرفع للإكلير …يعنى هما السبب إن الإكلير ينتفخ (زى كده الفطير المشلتت لازم درجة حرارة عالية علشان يورق )…

_طيب تعالوا نتفق إننا نحطه على درجة الحرارة العالية على الأقل( ٢٥)دقيقة ونلاحظه أول ماينتفخ ويدخل على إن الوش يلون ممكن نخلى درجة الحرارة (١٧٠)للآخر علشان نضمن إن القلب يستوى من غير الإكلير مايتلسع (الحل ده علشان اختلاف درجات الحرارة للأفران )

_الإكلير مبيخرجش طرى من الفرن طبعا (ده مش فينو )…اللى بيطريه لما نحط الحشو ونغطيه بالشيكولاته

 

التعليقات متوقفه