طريقة عمل الدونتس – بطريقة Dina Raafat Ahmed
بطريقة: Dina Raafat Ahmed
الطريقة:
نجيب بولة ونحط فيها ٢ كوباية ونص دقيق منخول عليهم ٣ معالق لبن بودرة عليهم معلقة كبيرة خميرة فورية وذرة ملح ومعلقة خل ومعلقتين كبار سكر ومعلقتين كبار مايونيز وعلبتين زبادي ومعلقة صغيرة بيكنج بودر و نخلطهم كلهم مع بعض.
و نكون مجهزين عندنا مياه دافية مش سخنة ومش ساقعة علشان الخميرة متموتش خلي بالك.
بعد كده ننزل بالمياه الدافية علي الدقيق حسب العجن حبة حبة لحد مالعجينة تلم معانا وتبقي طرية حلوة.
نغطيها بقي و نسيبها تريح ١٠ دقايق وطريقة التقطيع اللي هنعملها دي بتاعة الشيفات ع أصولها اللي بيعملوها في المحلات
بعد ١٠ دقايق نطلع العجينة ونعمل ايدينا قبضة و نمسك العجينة و نخليها تطلع من قبضة الايد.
وبعدين نكورها علي الرخامة أو بين ايدينا و نجيب صينية نحط فيها دقيق كتير و نحط فيها الكور دي و نسيبها تخمر لمدة ربع ساعة
بعد ربع ساعة نجيب قطاعة صغيرة ومن النص في الكورة و نضغط بالقطاعة هتطلع معانا الحتة الصغنتتة.
وبعد ما تتقطع نسيبه يخمر ربع ساعة تاني وبعدين نجهز زيت غزير سخن ولكن مش مقدوح.
مسيل الدونتس بالراحة و ننزلها الزيت هتاخد حوالي نص دقيقة علي كل وش.
وبعدين نسيبها تبرد و نزينها براحتنا ممكن كراميل أو شوكولاتة أو سكر بودرة
التعليقات متوقفه