طريقة عمل الكنافة بالقشطة بطريقة @maha_attia1 | حلويات | وصفات حلويات

680

الطريقة:

نجيب نص كيلو كنافة و نفردها كويس ونجهز كوباية إلا ربع سمنة سايحة وننزلها علي الكنافة وندعكهم كويس ببعض.

نجيب صنية ونحط نص كمية الكنافة ونضغط كويس عليها ولو نضغط فوقها بصنية أصغر يكون أفضل عشان تبقي متماسكة ومتساوية.

نيجي بقي لقشطة الكنافة أنا ساعات بعملها بطريقة سهلة من غير كريمة ولا حاجة، بجيب حلة علي النار واحط فيها كوبايتين لبن و٣ معالق نشا ورشة فانيليا وبحط معلقة سكر واقلب كويس لحد ما القوام يتماسك وافردها علي الكنافة واحط فوقها باقي الكنافة ونساويها برده.

ندخلها الفرن لمدة ٢٥ دقيقة علي درجة حرارة ٢٠٠ ونطلعها نقلبها علي وشها التاني وتدهنوا الصنية سمنة تاني عشان التاني ياخد لون برده ونرجعها الفرن ربع ساعة مش أكتر نطلعها بقي ولما تهدي نحطها في طبق التقديم والشربات نكون مجهزينه.

الشربات عبارة عن كوبايتين ونص مياه وكوبايتين سكر وعصرة لمون ورشة فانيليا ونسيبه يبرد ويفضل لو سبناه فالتلاجة شوية وبعدها نطلعه ونسقي الكنافة بحوالي كوبايتين ونص من الشربات اللي عاملينه وبكدة تكون جاهزة للأكل.

التعليقات متوقفه