طريقة عمل النودلز والفراخ الكانتون – بطريقة Mamet Joe
المقادير والطريقه
مكرونة شرايط مسلوقه انا استعملت إيطاليانو
نص كيلو فراخ فيليه مقطعة شرائح
بصلة مقطعة شرائح
فلفل ألوان مقطع شرائح، جزر شرائح
الصوص
٢ معلقة كبيرة كاتشب
٢ معلقة كبيرة صويا صوص
معلقة كبيرة خل
معلقة صغيرة سكر او عسل ابيض
معلقه كبيره نشا ندوبها ف كوب ميه
تتبيلة الفراخ
كوب دقيق ، ملعقة صغيرة من كل التوابل دي ،ملح ، صغيرة فلفل اسمر، بابريكا ، توم بودرة ،بصل بودرة ،بيكنج باودر ، نشا
الخطوات
هنتبل الفراخ بالدقيق و التوابل (الملح والفلفل والبابريكا والتوم البودرة والبصل البودرة و بيكنج باودر والدقيق ، والنشا) ونخلطهم سوا كويس
نحمر الفراخ ونخليها تاخد لون دهبي حلو ماتوصلش للون غامق
في طاسة ع النار فيها معلقة زبدة ومعلقة زيت ونحط شرايح البصل لحد ما تدبل بسيط وننزل بالماشروم وممكن من غيره عادي ونشوحه مع فص توم ناعم
و ننزل عليه بالفلفل الألوان والجزر ونشوحهم كلهم كويس لحد مانلاقي شكلهم والوانهم بانت وبقت مستويه وف نفس الوقت مش مهريه وشكلها زي الصوره
ننزل عليهم بالكاتشب والسكر و الصويا صوص والخل ونقلبهم كويس مع بعض وننزل بالفراخ ونقلبهم مع بعض تقليبتين لحد ماريحتهم تطلع وتقلب الدنيا
نضيف عليهم الماية إللي مقلبين فيها النشا ونقلب تقليبه كمان وننزل بالمكرونه المسلوقه يادوب نقلبهم تقليبتين ونطفي
وكدا نستعد عشان ناكلها ونفترسها
وصحتين وهنا
التعليقات متوقفه