طريقة عمل الرز المبهر و كباب الدجاج – بطريقة Doaa Abdel-rahman

1٬120

بطريقة: Doaa Abdel-rahman

الرز المبهر

في حلة على النار هنحط معلقة سمنة بلدي و معلقة زيت ذرة و نضيف عليهم ٢ كوب أرز مغسول و مصفى من الماء و نقلب كويس جدا لغاية ما ينشف من الميه و يتغلف تماما بالسمنة.

هنضيف فصين حبهان صحيح و قرفة عود و نص معلقة صغيرة بودرة زعفران و ملح و نقلب و ننزل بالمية المغلية لغاية ما تغطي الرز و زيادة عقلتين صباع و مكعب مرقة لو بتحبيه و نقلب و يغلي و بعدين نهدي النار خالص حتى تمام النضج.

ملحوظة: تفل البصل مش بنضيفه العجينة علشان متفرولش بنستخدم ميته بس في التصبيع.

كباب الدجاج

الطريقة:

نصف كيلو صدور فراخ مخليه هنفرمها ناعم جدا و عليها حبة صغيرة بقدونس مفروم و نصف معلقة صغيرة من توم بودر، بصل بودر، بهارات فراخ، بابريكا، زنجبيل، فلفل اسود، زعتر جاف و معلقة كبيرة زبدة و نظبط الملح و نخلطهم كويس جدا.

هنفرم بصلة و نرش عليها ملح و نعصرها و هناخد الميه فقط في طبق و نحط عليها حبة زيت و مية حبة طماطم مبشورة و هنخليها على جنب نصبع بيها. يفضل تدخل العجينة نص ساعه التلاجة بس انا اشتغلت على طول.

هنصبع الكفته على سيخ او ايد معلقة او عصا الشيش الموجود يسد و نبل ايدنا من مية البصل و نبصمها.

هنجيب صينية تيفال و ندهنها زيت بسيط خالص و نرص صوابع الكفته و تدخل فرن ساخن مسبقا على أعلى درجة على الشبكة في الرف الوسطاني بتاخد تقريبا ربع ساعة أو على حسب الفرن؛ اول ما تاخد لون ذهبي من تحت نشغل الشواية تاخد لون ذهبي من فوق و نطلعها على طول.

هنكون مسخنين قطعة فحم على النار نحطها في ورقة فويل و نحطها وسط الصينية و نضيف عليها نقطتين زيت تدخن و نغطي الصينية بالفويل علشان الكفتة تاخد طعم الفحم(الموضوع ده اختياري على فكرة) و تتقدم مع رز أصفر مبهر او حسب الرغبة و بألف هنا.
ملحوظة ١:
لازم تخلي بالك من كباب الفراخ لانه بيستوي بسرعة و مش عايزينه ينشف عايزينه طرى و جوسي فمتخليهوش يطول في الفرن لان الفراخ بتستوي بسرعة.
ملحوظة ٢:
لو خايفة الكباب ينشف منك ممكن تغلفي الصينية من البداية بالفويل و بعد ربع ساعة تكشفيها و تكمل تسويه تحت الشواية.

التعليقات متوقفه