وصفة عمل اللحمة الباردة (عرق تبيانكو) – بطريقة تسبيح الله

433

اللحمه البارده (عرق التربيانكو )

ملحوظه مهمه قبل الخطوات:
الاكله دي بتتعمل وتتاكل تاني يوم
طريقه اللحمه وخداها من الشيف هبه أبو الخير
في الغالب العرق بيكون مربوطه بطريقه معينه لكن الربط مش مهم قوي

الطريقه
بتجيبي عرق تربيانكو من الجزار بيكون وزنه حوالي ٢كيلو
انا قسمته نصين وعملت نص واحد
بتجيبي العرق تعملي فيه اخرام بالسكينه وتحطي فيها فصوص توم صحيحه وفلفل اسود صحيح وحبهان بس متكتريش حبهان بعد كده نجيب معلقتين سمنه او زبده نخلطهم مع معلقه صغيره بهارات لحمه وملح وفلفل اسود وبابريكا وندهن العرق بيهم ونسيبه في التتبيله ساعه

نجيب طاسه سخنه جدا نحط فيها معلقه واحده سمنه وننزل بالعرق في الطاسه ولازم تكون سخنه جدا ومنقلبوش كتير الوش الي يتحمر نقلبه وخلاص ..نكون محضرين حله فيها ميه مغليه وفيها بصله وجزره وطماطميه وكرفس لو متوفر وحبهان وفلفل اسود ومعلقه بهارات لحمه وننزل بالعرق الي اتحمر فيها ونحطلها معلقه صغيره ملح ولما يغلي نهدي النار ونسيبه علي نار هاديه لمده ساعتين
لما يهدي ندخله التلاجه في طبق منفصل بعيد عن الشوربه وندخل الشوربه كمان التلاجه علشان هنشتغل فيهم تاني يوم

تاني يوم بقي تجيبي العرق تقطعيه
ونحضر الصوص البني بتاع اللحمه البارده ..معلقتين دقيق علي معلقتين سمنه نحمره كويس لونه يبقي بني فاتح ننزل عليها ب٢كوب شوربه ونقلب كويس لحد ما يبقي معانا قوام وسط ..
انا هنا حمرت بطاطس وجزر نص تحميره وطلعتهم وجبت الصينيه نحط الاول طبقه من الصوص البني تحت ونبدأ نرص عليها اللحمه والخضار ونرجع نحط عليهم من الصوص تاني وندخلهم فرن سخن علي ٢٢٠ علي الرف الوسط والشوايه شغاله وهاديه لمده تلت ساعه
نقدم اللحمه مع الخضار وانا عملت جنبها رز بالخلطه والكبد والقوانص ولو عندك مكسرات وزبيب وصنوبر يكون احلي كمان
وبألف هنا

التعليقات متوقفه