طريقة عمل مكرونة نجرسكو – وصفات طبخ

465

بطريقة Sara Eslam

الحشوه :

نجيب طاسه سخنه ونحط زيت يسخن الاول
ننزل بالبصل مقطع مكعبات او مفروم خشن
تقليبتين و ننزل بالمشروم
وننزل بالفلفل الرومي الاخضر المقطع مكعبات ونقلب تقليبتين
ننزل بالفراخ (صدور فراخ متقطعه صغير)
ونقلب
وننزل بالتوابل بئا
زعتر
بابريكا
ملح
فلفل
سنة حبهان مطحون بسيطة (حسب الرغبة )
رشة مرقة فورية او نص مكعب مرقة (حسب الرغبة )

هتقلبي كويس جدا ياخد من طغم بعض كويس والبصل يدبل ولونه يغير شوية والفلفل يستوي وميته تنشف ننزل بفصين توم مبار مفرومين وهنا تقليبة واحدة يدوب تشمي ريحة التوم واقفلي علطول
في ناس بتحط رشة زتون حلقات بس انا مبحطش
ملحوظة: كتري الزعتر في الحشوة
الزعتر والتوم المفروم من اسرار حشوة المحلات هتفرق معاكي جدا

هنعمل البشاميل:

هتنزلي بمعلقتين سمنة بلدي او معلقة سمنة ومعلقة زبدة بتدي ريحة حلوة لو السمنة نباتي اختار نوع ريحته حلوة زي روابي او جنة او الهانم الصفرا
عليهم معلقتين دقيق وقلبي الدقيق يدوب يبئا دهبي ايدك فيه عشان دقيق البشاميل بيتحمر بسرعة وانزلي ب ليتر لبن وكبشة شوربة وملح وفلفل ابيض وبشرة جوزة الطيب ومكعب مرقة ومعلقتين قشطة كبار او كريمة اوجبنة كريمي او جبنة مثلثات وقلب لحد مايتقل معاكي لو انتي من الناس اللي بتحب تضيف بيضة عشان تعلي التيست معاكي باستني البشاميل يهدا خالص وضيفي البيضة مربوبة بنلح وسنة فلفل وحطيها وبالمضرب بسرعة اضربي

ملحوظة: انا بحب اعمل البشاميل خفيف وكريمي عشان بيتقل في الفرن خدي بالك كدة احسن

وهتكوني سالقة المكرونة نص سوا يعني فيها عضة بسيطة كدة اوعي تسلقيها سوا كامل عشان متعجنش في الفرن مبتبئاش حلوة

للنجرسكو استخدمي اسباجيتي او فيوتشيني

تجيبي صنيه تحطي فيها كبشة بشاميل صغيره في الأرضيه
هتجيبي المكرونة في بولة اوطبق طبعا بعد ماصفتيها كويس هتحطي المكرونة ونص كمية البشاميل ونص الحشوة وشوية موتزريلا محترمين كدة يعني ياما دي برضو من اشرار المحلات وقلبي كويس شربيهم من بعض
هتحطي في الصنية اللي فرشناها بشاميل نص المكرونة وطبقة بشاميل ورشة موتزريلا وباقي الحشوة في النص وباقي المكرونة ورشة موتزاريلا وراق بشاميل اخر حاجة ورشة موتزريلا عالوش حلوة كدة دخليها الفرن شغليلها من تحت الاول شوية وبعدين شغلي الشواية الحبنة تاخد لون كدة وتسيح
#ملحوظة علي فكرة الاجمل كمان انك تخلطي الحشوة كلها مع المكرونة وكبتين بشاميل وجبنة موتزريلا بتسيح وتبئا تحفة كدة من جوا زي اللي بتاكليها في المحلات كدة احلي بتحسي ان كل المكرونة وصلها من طعم الحشوة احسن من فكرة راق وراق وبالهنا والشفا

التعليقات متوقفه